হাইলাকান্দির মাত কথা
রফিক উদ্দিন লস্কর
হাইলাকান্দির মানুষ আমরা
ছাতারে কই ছাত্তি,
বিড়াল দেখলে মেকুর কই
হাতিরে কই আত্তি।
যেছা সময় বন্যা আইলে
তারে বলি ঘোলা,
হাঁস মুরগীর নষ্ট ডিমরে
আমরা কই ভোলা।
গোরুর বাচ্চা পুরুষ যেটা
সে অইলো দামা,
শক্ত ফোলা ইট ইটার
আরেক নাম ঝামা।
শিং ছাড়া গোরু ছাগল
তারে কই বোচা,
চাউল ছাড়া ধান যেটা
ইটার নাম ছোছা।
পুরুষ পাখি দেখলে পরে
তারে কই মাদ্দা,
ময়লা কিংবা অপরিষ্কারের
বিকল্প নাম গাদ্দা।
সাদাসিধা গাঁওয়ের মানুষ
সীমরে কইন উরি,
ছোটমোটো নালা দেখলে
তারে ডাকইন জুরি।
আমরার বেজান শব্দ আছে
যেথা অভিধানে নাই,
আমরা কিন্তু নিজের ভাষায়
মাতিয়া আরাম পাই।
রচনাকাল: ২৯/০৫/২০২৪ ইং, ১৬:৩৪ মি. কাটলিছড়া-হাইলাকান্দি।
কোন মন্তব্য নেই:
একটি মন্তব্য পোস্ট করুন