কটাই চাচার দুই পুয়া
রফিক উদ্দিন লস্কর
বিয়ান অইলে বারইন
বিয়ালিবালা আইন,
হারাদিন বিছরার মাঝে
হকলে তানে ফাইন।
আমরার বাড়ির ধারর
খালর পূব পারো
খেত করিয়া কটাইচাচায়
যাইতরা বছর বারো।
উরি ঝিঙা পানিকদুর
ওলা বান্ডা ছার,
বুবির লাখাইন ধরছে
বেছইন ভার ভার।
খেত-কিষি আনাজপাতি
বাড়ি ভরা গাছ,
বাখাইর ভরা ধানচাউল
পুরখি ভরা মাছ।
কটাই চাচার আছইন
ডেমা দুই পুয়া,
হারাদিন দেখবায় তারা
দিতরা কুরু-ভুয়া।
পড়াশোনা বাদ দিয়া
বাউটামি খুব খরইন,
টেখাপয়সার লাগি তারা
অন্য লাইন ধরইন।
একদিন গাঁওর মানষে
বুঝিয়া তারার দাড়া,
হকলে মিলি তারারে
করছইন বাড়ি ছাড়া।
রচনাকাল: ৩০ মে ২০২৪ইং, ১৯:৩৪মি. কাটলিছড়া-হাইলাকান্দি।
কোন মন্তব্য নেই:
একটি মন্তব্য পোস্ট করুন